Internasjonalt arbeid

Generelt er det ei utvikling mot større internasjonalisering og standardisering av jernbaneverksemda i Europa. Tilsynet har derfor som mål å vere aktivt med i relevante internasjonale fora for å medverke til erfaringsutveksling om trafikktryggleik, for å sikre seg kunnskap om utviklinga i andre land og for å fremje harmonisering av regelverk, spesielt mot EU. Noreg har tradisjonelt hatt eit nært samarbeid med Sverige og Danmark om grenseoverskridande trafikk. Dette arbeidet vil halde fram både mellom infrastrukturforvaltarane, trafikkutøvarane og tilsynsmyndigheitene.

Statens jernbanetilsyn deltek på vegner av Samferdselsdepartementet som observatør i relevante EU-komitear og andre EØS-fora. Tilsynet deltek òg som representant for Noreg i styret i Det europeiske jernbanebyrået (ERA – European Railway Agency) og i ulike arbeidsgrupper oppretta av byrået.

Elles samarbeider tilsynet med andre jernbanetilsyn på nordisk nivå og innan EØS-området. Det er oppretta samarbeidsorgan på nordisk nivå (NID) og på europeisk nivå (International Liaison Group of Government Railway Inspectorates – ILGGRI)

Tilsynet prioriterer å ta del i internasjonalt standardiseringsarbeid fordi mange europeiske standardar vert styrande gjennom EU-tilknytinga vår.